کیسے کیسے ہم نے دیکھے دنیا کے متوالے لوگ |
چمڑی جانے دیں پر رکھیں دمڑی حرص کے پالے لوگ |
جس دنیا میں ہم بستے ہیں رنگ برنگے لوگ یہاں |
کچھ معصوم سے لیکن کچھ ہیں آفت کے پرکالے لوگ |
دھوکہ دے کر مال کمائیں اس پر پھر وہ ناز کریں |
جھوٹی آن کا دعوٰی کرنے والے کیسے ٹالے لوگ |
ایسے بھی ہیں عمر گنوا کر مال بنا کر بیٹھے ہیں |
دولت سے اب وقت کو ڈھونڈیں کتنے بھولے بھالے لوگ |
کھا پی کرجو سوئے جاگے، کام کیا اور گھر آئے |
گھر پر ٹی وی ، فون ڈرامے دیکھیں گورے کالے لوگ |
کس کو فرصت ہے کہ دیکھے کون گیا تھا کون آیا |
اُٹھ کر دیکھیں گے جب پڑ گئے اپنی جان کے لالے لوگ |
جن کے مال خدا کی خاطر ہر دم حاضر رہتے ہیں |
وقت پڑے تو جان لُٹا دیں دلبر پر دل والے لوگ |
دین کی خاطر ہر پل گزرے جن کا بھی اس جیون میں |
فضلِ خدا کے مورد ہیں وہ ہر دم اللہ والے لوگ |
طارق جو بھی کام کرو تم اپنے ربّ کو یاد کرو |
وہ رکھے گا یاد تمہیں کھولیں گے دل کے تالے لوگ |
معلومات