تری عظمتوں کی تو حد نہیں تری رحمتوں کا حساب کیا |
کہاں آگہی کو تھا حوصلہ تری معرفت کی تھی تاب کیا |
تری خامُشی میں قرار ہے تری گُفتگو میں خُمار ہے |
ترے حُسن پر جو نظر پڑے تو عذاب کیا تو ثواب کیا |
مری طاعتیں تو قبول تھیں مری جُر اَتیں بھی روا رہیں |
ترے ساتھ قول و قرار تھا تو حساب کیا تو کتاب کیا |
تری رحمتوں کے طفیل میں تو جہاں بھی تھا رہا سُر خرُو |
ترے درسے ہی ملیں چاہتیں کوئی شاہ کیا تو نواب کیا |
تو جو میرے دل کے قریب ہے مجھے آسرا تو تِرا رہا |
ترے سامنے جو ہوا ہے سب تجھے اس کا دینا حساب کیا |
مرے جسم و جاں ہیں سبھی ترے تُو کئے جا چاہے جو دل تِرا |
مرے دل میں جلوہ نُما ہے تُو تِرا وہ نشہ کہ شراب کیا |
تجھے اس سے کیا کوئی اور بھی ترے جیسا اس پہ ہوا فدا |
ترے ساتھ طارقِ خستہ جاں جو ہوا کبھی تھا خراب کیا |
معلومات