| جو سمجھ آئے تمہاری ، وہ زباں ، بولے گا |
| وہ جو نظروں سے تمہاری ہے نہاں ، بولے گا |
| ہے وہ شہ رگ سے بھی نزدیک پکارو اس کو |
| دل کو گر اس کا بنایا ہے مکاں ، بولے گا |
| جس کی صحبت میں کوئی وقت گزارا جائے |
| ایک دن وہ بھی تو پھر اس کی زباں بولے گا |
| بتکدہ دل کو اگر تم نے بنا رکھا ہے |
| جاؤ گے اور کہاں ، عشقِ بتاں بولے گا |
| تم نے چاہت کو جو سامانِ تجارت جانا |
| پاؤ گے پھر تو زیاں ، سارا جہاں ، بولے گا |
| آبلے پاؤں میں ہوں ، راستہ مشکل ، پھر بھی |
| چلتے جاؤ گے تو منزل کا نشاں بولے گا |
| پوچھ کر دیکھو ملاقات ہوئی ہے جس کی |
| اُس کی تعریف میں وہ کیسا رواں بولے گا |
| طارقؔ ، آثارِ محبّت نظر آ جائیں گے |
| آگ جلتی ہے کہیں جب تو دُھواں بولے گا |
معلومات