| آدمی انسان ہے اور آدمی حیوان ہے |
| دیکھ کر اُس کو فرشتہ بھی ہوا حیران ہے |
| ہو گیا دنیا میں آکر اس قدر مصروف وہ |
| مقصدِ تخلیق سے بھی ہو گیا انجان ہے |
| جس نے بھیجا تھا یہاں وہ یاد بھی اس کو نہیں |
| نام ہی کو رہ گیا باقی اگر ایمان ہے |
| ظلم کرتا ہے یہاں تک جان بھی ناحق یہ لے |
| جانتا ہے گرچہ قبضے میں خدا کے جان ہے |
| احسنِ تقویم سے قعرِ مزلّت میں گرے |
| بھول جائے یوں خدا کو جو کہاں انسان ہے |
| ہاں مگر انسان ہے وہ جس نے پائی روشنی |
| معرفت کے نُور سے جس کی ہوئی پہچان ہے |
| فائدہ پہنچے ہے اس کی ذات سے ہر ایک کو |
| اس کی بخشش پر تو شاہد خود ہوا قرآن ہے |
| سب کی ہو دل میں محبّت اور نہ ہو نفرت کوئی |
| آدمی پھر تو فرشتوں سے بڑا انسان ہے |
| اشرف المخلوق کہلائے گا تب ہی آدمی |
| جب گواہی دے عمل وہ بندۂ رحمٰن ہے |
| ٹوٹتی ہے تان جا کر اس پہ طارق جان لو |
| آدمی انسان بن جائے تو اس کی شان ہے |
معلومات