| ابتدا ہی میں ملی مجھ کو سزا یاد آیا |
| مجھ کو جنّت سے نکالا بھی گیا یاد آیا |
| گیلی مٹی سے اُٹھایا گیا آدم کا خمیر |
| اور شیطان جو آتش سے بنا یاد آیا |
| کشتیٔ نوح میں آ بیٹھے بچائے جو گئے |
| کب تھا سیلاب میں فرزند بچا یاد آیا |
| جس پہ فرعون بھی چڑھ دوڑا تھا لشکر لے کر |
| اژدہا بن گیا جس کا تھا عصا یاد آیا |
| جو بھی آیا ہے یہاں جانا ہے اک دن اس کو |
| جو گیا جاتے ہوئے اُس نے کہا یاد آیا |
| آگ میں ڈالا گیا جس کو جلا تھا کب وہ |
| اُس کا تو بال بھی بیکا نہ ہوا یاد آیا |
| تشنہ لب چھوڑ کے صحرا میں گیا تھا کوئی |
| پھر وہاں چشمۂ زمزم بھی اُٹھا یاد آیا |
| عمر ساری جو گزاری اسے سوچا ہی نہیں |
| آخری وقت وہ یاد آیا تو کیا یاد آیا |
| کیوں بھلا مانگ نہ لیں اُس کو اسی سے طارق |
| خواہشیں ختم ہوئیں اب تو خدا یاد آیا |
معلومات