عطا تجھ کو جنت ہو اے پیارے دادا |
عطا تجھ کو جنت ہو اے پیارے دادا |
خدا تجھ پہ رحمت کرے اور زیادہ |
عطا تجھ کو جنت ہو اے پیارے دادا |
. |
سفر آخرت کا ہو آسان تجھ پر |
کرم ہو خدا کا ہو فیضان تجھ پر |
برستا رہے نورِ غفران تجھ پر |
رہے مہرباں دستِ رحمان تجھ پر |
. |
ہو نوری فضا اور لحد ہو کشادہ |
عطا تجھ کو جنت ہو اے پیارے دادا |
. |
کرے رشک سارے ہی انسان تجھ پر |
فدا کیوں نہ ہو پھر مری جان تجھ پر |
ہوا ہے خدا کا یہ احسان تجھ پر |
مکمل ہوا آج رمضان تجھ پر |
. |
مبارک تجھے عید ہو میرے دادا |
عطا تجھ کو جنت ہو اے پیارے دادا |
. |
ترے ہجر میں ہے نگہ آبدیدہ |
جلا سوزِ غم سے دلِ آفریدہ |
تجھے کیا بتاؤں اے الله رسیدہ |
مبارک تری ہستیِ برگزیدہ |
. |
عطا دیدِ رب ہو تجھے نیک زادہ |
عطا تجھ کو جنت ہو اے پیارے دادا |
. |
سماع منتظر تیری آواز کا ہے |
تری شوخیَ و ناز و انداز کا ہے |
قیامت سا غم ترے پرواز کا ہے |
پریشان دل ترے ہم راز کا ہے |
. |
کہاں چل دئے چھوڑ کر میرے دادا |
عطا تجھ کو جنت ہو اے پیارے دادا |
. |
سنانے تجھے غم کبھی میں پسر زاد |
لئے قلبِ آزردہ آؤں گا فریاد |
رہوں گا نگہ میں میں کس کی سدا شاد |
دعاؤں میں پھر کس کو آؤں گا میں یاد |
. |
لحد پر تری روتے آؤں میں دادا |
عطا تجھ کو جنت ہو اے پیارے دادا |
. |
پکارے گا اب کہہ کے دادا مجھے کون |
مرے سر پہ شفقت کا سایہ رکھے کون |
مرے گھر نہ آنے کو اب پوچھے کون |
دعاؤں میں اب یاد رکھے مجھے کون |
. |
خدا خوش رکھے تجھ کو اے پیارے دادا |
عطا تجھ کو جنت ہو اے پیارے دادا |
. |
ملیں گے جو محشر میں نزدِ الہی |
ترے نیک طینت کی دوں گا گواہی |
ملی آج منزل تجھے بھی اے راہی |
بہت یاد آؤ گے اے جدِّ شاہی ؔؔ |
. |
بہت نیک سیرت تھے کردار سادہ |
عطا تجھ کو جنت ہو اے پیارے دادا |
. |
دادا مرحوم کی یاد میں.مرحوم عبد الصمد صاحؒب غفر لہ |
معلومات