| کیوں قلم چلتا نہیں تیرا حزیں حالات پر |
| صِنفِ نسواں ہو گئی حاوی ترے جذبات پر |
| کیا یہی اک خواب ہے تیرے جزیروں کی امیں |
| اس سے آگے بڑھ کے تیری سوچ جا سکتی نہیں |
| ہر گھڑی زلفوں کی باتیں ہر زماں سیمیں جمال |
| چشم و ابرو پر مقالے صبر و ایماں خال خال |
| واہ واہ کیا خوب صورت ہونٹ ہیں کیا ناک ہے |
| اپسرا عذرا و وامق کا لبادہ چاک ہے |
| کس قدر الھّڑ بھی ہے اور نرم و نازک گفتگو |
| دیکھنے کو شیخ بھی رہتے ہیں ہر دم باوضو |
| کیوں نہیں تُو سوچتا یہ ماں بھی ہے بیٹی بھی ہے |
| تیرے فردا کی امیں ہے نسل کی کھیتی بھی ہے |
| تھی جو پردے میں کبھی وہ جانِ محفِل ہوگئی |
| چار دیواری میں تھی اب نقشِ محمِل ہو گئی |
| مَیں بھی کہتا ہوں غزل لیکن نہیں ہے اِشتہا |
| سامنے رکھّا اسے جو زندگی میں بھی رہا |
| اصل میں اب نسلِ انسانی بڑے خطرے میں ہے |
| وہ کہ بحرِ بیکراں تھا اب زبس قطرے میں ہے |
| بیچتی ہیں مائیں بھی بہنیں بھی لاشہ ہرجگہ |
| تب کہیں مخصوص تھا اب یہ تماشا ہر جگہ |
| آہ کتنی بھُوک ہے غُربت ہے استیصال ہے |
| ہر زماں ہے ہر گھڑی ہر ماہ ہے ہر سال ہے |
| درسگاہوں میں سکولوں میں مظالم الاماں |
| برگ و گُل پر پھول پر لُوطی جہنّم الاماں |
| چھین لیتے ہیں حسیں پھولوں سے اُن کا بانکپن |
| دین کے پردے میں ننّھی جان کا جلتا بدن |
| لے گئے تثلیث کے فرزند بازی ہر جگہ |
| ہم شہیدوں کی قباؤں میں ہیں غازی ہر جگہ |
| مُوقلم کے زور پر بدلو زمانے کی فضا |
| قابلیّت بھی ہے ہمّت بھی تو پھر ڈرنے کا کیا |
معلومات