| جو بہت سوچیں ، تردّد میں پڑا کرتے ہیں |
| سادہ ہوتے ہیں محبّت جو کیا کرتے ہیں |
| یاد آتا ہے مصوّر جو نظر آئے صنم |
| جن کا ہوتا ہے خدا، یادِ خدا کرتے ہیں |
| زندگی مثلِ حباب آتی ہے اور جاتی ہے |
| دیکھتے دیکھتے بن کر وہ مٹا کرتے ہیں |
| آتشِ عشق سدا رکھتے ہیں روشن دل میں |
| جو جلیں اس میں کہاں پھر وہ بجھا کرتے ہیں |
| وہ جو دیکھے تو نظر آتے ہیں بسمل کتنے |
| جب چلیں تیر نظر ، کب وہ خطا کرتے ہیں |
| زخمِ دل لے کے یہاں لوگ چلے آتے ہیں |
| وہ مسیحا ہیں تو زخموں کو سیا کرتے ہیں |
| جن کو شکوہ ہے زمانے سے، زمانہ جانے |
| ہم نبھاتے ہیں اگر عہدِ وفا کرتے ہیں |
| اس کے دیوانوں میں شامل ہیں تو خوش ہیں طارق |
| ربّ کا اس بات پہ صد شکر ادا کرتے ہیں |
معلومات