| ہم سے جو کبھی تم کو شکایت بھی رہی ہے |
| یہ ہم سے محبّت کی علامت بھی رہی ہے |
| کچھ آپ سے اپنا ہے تعلّق بھی پرانا |
| کچھ ہم کو روایت سے محبّت بھی رہی ہے |
| اک غنچۂ گل صبح ، چٹکتے ہوئے بولا |
| ساتھی مرا سورج کی حرارت بھی رہی ہے |
| کمزور بڑھاپے نے کِیا جو ، سو کِیا ہے |
| بیماری سے کچھ اور نقاہت بھی رہی ہے |
| کچھ آپ کی صحبت میں نہیں خشک مزاجی |
| کچھ اپنی طبیعت میں شرارت بھی رہی ہے |
| موسم کے بدلنے کا اثر باقی ہے اب تک |
| ماحول میں ہلکی سی تمازت بھی رہی ہے |
| کچھ رشتہ ہمارا بھی محبّت سے جُڑا ہے |
| کچھ آپ کی ہم پر تو عنایت بھی رہی ہے |
| حالات ہی بدلے ہیں ابھی دل نہیں بدلے |
| اپنوں سے محبّت کی روایت بھی رہی ہے |
| طارق ہمیں اس دور میں عزّت جو ملی ہے |
| شاید کہ سبب اس کا ولایت بھی رہی ہے |
معلومات