| اس مرتبہ کیا خدا کے گھر کا جب طواف |
| نکلی یہ میرے دل سے دعا دیکھ کر غلاف |
| کرتا ہے تُو قبول دعائیں سبھی یہاں |
| رحمت سے اپنی کر دے مرے سب گنہ معاف |
| شیطان مجھ سے دور ہو تیری پنہ ملے |
| مجھ کو نہ ہو کبھی ترے حکموں سے انحراف |
| تُو نیکیوں کی بھی مجھے توفیق کر عطا |
| تیرے نبی سے ہو نہ کبھی مجھ کو اختلاف |
| وہ تھی قبول ہونے کی شاید کوئی گھڑی |
| پھر ہر طرف سے نُور کا تھا جیسے انعطاف |
| مجھ کو لگا قبول مری ہو گئی دعا |
| اس روز مجھ پہ ہو گیا واضح یہ انکشاف |
| حاجت نہیں ہے اس کو کسی کے سجود کی |
| پر شرط اک یہی ہے کریں دل کو پاک صاف |
| طارق نہیں ہے عرش بہت دُور کر دُعا |
| پہنچیں اُڑان بھر کے ترے لفظ واشگاف |
معلومات