| اے سخنور اُٹھ کہ وابستہ ہے تُجھ سے انقلاب |
| تھام لے اپنا قلم اب چھوڑ طاؤس و رباب |
| پھیلتا جاتا ہے بحر و بر میں ہر جانب فساد |
| دیکھ لے اخلاق سے عاری ہوئے اہلِ کتاب |
| دہریوں سے کیا گلہ ان کا خدا کوئی نہیں |
| اب خدا والوں پہ بھی آئے نظر اس کا عتاب |
| دسترس دل تک نہیں ہے نور کی پردے پڑے |
| روشنی تو دے رہے ہیں آفتاب و ماہتاب |
| رہبروں میں اہلِ دانش کا بڑا فقدان ہے |
| آ گیا سیلاب کہتے ہیں نظر آئے سراب |
| ہوش میں لانا ہے ان کو بھی سلیقے سے ہمیں |
| جن کی گھٹّی میں پڑا ہے رات دن پینا شراب |
| خود سری لالچ تعصّب ضد ہے اور ذاتی مفاد |
| مل کے ساری کر رہی ہیں عادتیں ان کو خراب |
| دے کے دروازے پہ دستک گر جگائیں گے نہ ہم |
| کیا بچائیں گے وہ طارق جو رہیں گے محوِ خواب |
معلومات