| اب تو ایسا کوئی قانون بنایا جائے |
| سچ کہے جو بھی اسے سولی چڑھایا جائے |
| اس لئے بھی ترے عشّاق گرفتار ہوئے |
| اپنے سینے پہ تِرا نام کڑھایا جائے |
| اب تو سورج بھی سوا نیزے پہ آ پہنچا ہے |
| اب تو سوئے ہوئے لوگوں کو جگایا جائے |
| ہیں کہاں میرے وفادار صدا آتی ہے |
| عہد جو باندھ کے بیٹھے ہیں نبھایا جائے |
| وقت پر پانی جو برسایا گیا ہے پھر سے |
| وہ تو ہر پیاسے کو جی بھر کے پلایا جائے |
| آ گیا ہے کوئی گلشن کی حفاظت کے لئے |
| سُرخ پھولوں سے ہر اک رہ کو سجایا جائے |
| صُور پھونکا ہے کسی نے تو قیامت آئی |
| کھول کر کان یہ بہروں کو سنایا جائے |
| شادیانے تو خبر دیتے ہیں اب منزل کی |
| جانے کون اترے کسے آگے چلایا جائے |
| دیر تک ہم سے وہ ناراض نہیں رہ سکتے |
| اب تو روٹھے ہوئے لوگوں کو منایا جائے |
| آزمائش کی گھڑی جب بھی کبھی آئی ہے |
| کون تیّار ہوا ہم کو بتایا جائے |
| طارق آیا ہے جو سچ سامنے واضح ہو کر |
| جھوٹ کو کر کے برہنہ بھی دکھایا جائے |
معلومات