| عالَم کی قیادت سے جو مومن ہے کنارا |
| ہے اس میں سراسر تری دنیا کا خسارا |
| ہے بس کہ یہی غیرتِ ایماں کا تقاضہ |
| کافر کی اطاعت نہ ہو مومن کو گوارا |
| ہاں ، مردِ جہاں گیر و جہاں بان و جہاں دار |
| یورپ کی غلامی پہ نہیں کرتا گزارا |
| مغرب کو سمجھتے ہیں یہ تہذیب کا محور |
| شیشہ گرِ یورپ نے دکھایا جو نظارا |
| اس دور میں ہر نقشِ رہِ ملتِ بیضا |
| ہے ظلمتِ شب میں یہ چمکتا ہوا تارا |
| دنیا کو ملی جس سے ہی اسلام کی دولت |
| افسوس کہ ہے اس کی فضا دھند و غبارا |
| خاموش و ہراساں ہے ترا عالمِ اسلام |
| عربوں کو جگا شاعرِ عجؔمی تو خدارا |
| اسلام سکھاتا ہے ہمیں رمزِ حکومت |
| ہے اپنی زمیں ہند کی سرحد سے بخارا |
| ہم کیوں ہوں کسی غیر کی چوکھٹ کے سوالی |
| یہ بزمِ جہاں اول و آخر ہے ہمارا |
| اسلام کی فطرت میں ہے مٹ مٹ کے ابھرنا |
| واعظ نے یہ کہہ کے جوانوں کو ابھارا |
| ہے دوشِ جواں مرد پہ یہ گرچہ گراں بار |
| اقوامی سیادت ترے قبضے میں ہو یارا |
| تو عظمتِ رفتہ ہے تو دیرینہ روایت |
| ملت کا تحفظ ہو تجھے سب سے ہی پیارا |
| تعمیرِ خلافت ہو اگر مقصدِ ہستی |
| تو چین و عرب مصر و فلسطیں بھی تمہارا |
| ہر ذرۂ عالم ہے ترے حق میں دعا گو |
| ہو مشرق و مغرب میں ترا دور دوبارا |
| شاہؔی تو جوانوں کو سکھا فنِ سیاست |
| ہے ہندی مسلماں کو فقط اس کا سہارا |
معلومات