| جو تم نہیں تو ہزاروں میں جی نہیں لگتا |
| خزاں کی چھوڑو ، بہاروں میں جی نہیں لگتا |
| ہمیں کوئی نہ ملا آج تک جو کہتا ہو |
| ہمارا ان دنوں یاروں میں جی نہیں لگتا |
| یہ ہم جو ہجرتوں کے تجربے سے گزرے ہیں |
| نہیں یہ بات کہ پیاروں میں جی نہیں لگتا |
| لپٹ کے لہر سے دریا میں جو بڑھیں آگے |
| وہ لاکھ چاہیں کناروں میں جی نہیں لگتا |
| جنہیں یقین ہو زندہ خدا کے ہونے کا |
| کبھی پھر ان کا مزاروں میں جی نہیں لگتا |
| اگر فساد ہی ڈالا گیا ہو گھُٹی میں |
| تو عافیت کے حصاروں میں جی نہیں لگتا |
| سخن شناس ہی آتے ہیں تیری محفل میں |
| وہ جن کا عقل کے ماروں میں جی نہیں لگتا |
| اب آ ہی جائے نظر میں ہماری منزل بھی |
| ہمارا راہ گزاروں میں جی نہیں لگتا |
| کہیں سے تم بھی سواری کا انتظام کرو |
| پیادہ پا کا سواروں میں جی نہیں لگتا |
| رہی ہے گردشِ شام و سحر یونہی طارق |
| تمہارا کیسے مداروں میں جی نہیں لگتا |
معلومات