| بتلائیں کیا ہمیں اسے ملنے سے کیا ملا |
| عرفانِ ذات ہو گیا اپنا پتا ملا |
| صدمات اپنے دیکھ کے تھے دل گرفتہ ہم |
| بھولے سبھی ہمیں جو وہ غم آشنا ملا |
| منزل کا کچھ پتہ نہیں تھا جب چلے تھے ہم |
| اس کی عطا سے پھر ہمیں اک رہنما ملا |
| اس نے دکھا دیا ہمیں منزل کا راستہ |
| جو لے چلا ہمیں اسی کا نقشِ پا ملا |
| دیکھا خدا کا عکس جو انساں کے روپ میں |
| ہر ذرّہ اس کے حسن کا پھر آئنہ ملا |
| رستے میں لڑکھڑائے بھی نازک قدم تھے جو |
| اس سے مگر وفا کا ہمیں حوصلہ ملا |
| طارق سفر پہ جب چلے خود اس نے تھاما ہاتھ |
| بھٹکے ہوئے تھے ہم نہ تھا جب تک خدا ملا |
معلومات