| گنبد کو توڑ دو گے مینار توڑ دو گے |
| تم مسجدیں بھی شاید دو چار توڑ دو گے |
| آخر کو کیا ملے گا کلمہ تمہیں مٹا کے |
| حق کا جو ہو رہا تھا اظہار توڑ دو گے |
| ایمان سے منوّر توڑو گے دل یہ کیسے |
| ان پر رقم خدا کا کیا پیار توڑ دو گے |
| نقصاں کرو گے کس کا ثابت کرو گے کیا تم |
| جب باغ کے شجر تم پھلدار توڑ دو گے |
| آپس میں گو لڑو تم سازش تو یہ کرو تم |
| توحید کا دلوں سے اقرار توڑ دو گے |
| تم نفس کے پجاری ایمان سے ہو عاری |
| کرسی ملے تو دیں کا پندار توڑ دو گے |
| کلمہ سے کیا غرض ہے مقصد فساد سے ہے |
| جس کے لئے ہر اک حد ہر بار توڑ دو گے |
| پہلے بھی تم سے آئے حربے سب آزمائے |
| کچھ بھی نہ کام آئے اوزار توڑ دو گے |
| ہم جیل میں گئے ہیں پہلے بھی اس کی خاطر |
| سینے بنیں گے پھر سے دیوار توڑ دو گے |
| تاریخ کو اُٹھا کر دیکھو تو اک نظر تم |
| تم نے کئے جو وعدے ہر بار توڑ دو گے |
| تم آئینے سے ڈر کے چہرہ چھپا رہے ہو |
| آئین خود ہی اک دن سرکار توڑ دو گے |
| طارق لکھا ہے کلمہ ہر احمدی کے دل پر |
| ان سے کہو یہ دل پھر اک بار توڑ دو گے |
معلومات