| چلے جو دھوپ میں پھر جسم نے تو جلنا تھا |
| جو سایہ بن کے چلا ساتھ اس کے چلنا تھا |
| قدم رکھا تھا جوانی میں کچھ دنوں پہلے |
| خبر نہیں تھی اسے اتنی جلدی ڈھلنا تھا |
| وہ ہم سے پہلے مسافر تھے حوصلے والے |
| وگرنہ ہم نے کہاں راستہ بدلنا تھا |
| ہمیں ملی ہے جو ہر سمت سے پذیرائی |
| سبب تو اس کا بنا شہر سے نکلنا تھا |
| جھکے ہیں بادشاہ تسلیم کر کے قدموں میں |
| حسد کی آگ میں تو حاسدوں نے جلنا تھا |
| ہے نفرتوں کو کیا خون میں اگر شامل |
| تو ان کے دل میں محبّت نے کیسے پلنا تھا |
| اگر نہ رحمتِ یزداں سے ہو قبولِ دعا |
| عذاب آیا ہوا کوئی کیسے ٹلنا تھا |
| ہے طارق اس کا ہوا ہر قدم پہ جُود و کرم |
| تو دل اسی کی محبّت میں پھر مچلنا تھا |
معلومات