ابتدا کرتا ہوں لے کر نام اُس اللّٰہ کا |
جس نے بِن مانگے دیا ہے رحم جس کا بے بہا |
جو بھی ممکن ہو سبھی تعریف ہے اللّٰہ کی |
جس سے بہتر ہو نہ ممکن وہ ثنا اللّٰہ کی |
سب جہانوں کا ہمیشہ سے وہی پرور دگار |
سب پہ بِن مانگے عطایا رحم اس کا بار بار |
اُس نے کی تخلیق جب مدِ نظر اُس کو رہیں |
حاجتیں جو ہوں کبھی یا اب تلک مجھ کو رہیں |
فضل اُس کے مجھ پہ بن مانگے بھی کثرت سے ہوئے |
میری کوشش کو بھی اُس نے بارہا پھل دے دئے |
روزمحشر اپنی ہر تخلیق کا مالک بھی وہ |
اور اس دن ہو گا ہر اک رو ح کا سالک بھی وہ |
میں ہمیشہ تیرا بندہ ہی بنوں بن کے رہوں |
استعانت بھی ہمیشہ میں طلب تجھ سے کروں |
راستہ سیدھا چلوں ایسا جو تُجھ تک لے چلے |
استقامت سے رہوں اس پر جو دکھ چاہے ملے |
نعمتیں جو پا گئے ہیں ان کا ہو وہ راستہ |
کوئی مغضوبوں سے گمراہوں سے ہو ناں واسطہ |
اے خدا میری دُعا کو کر قبولیّت عطا |
تُو ہی کرتا ہے جہانوں کی ربوبیّت سدا |
معلومات