| آس کی ڈور پہ سانس تو اٹکی رہتی ہے بیماری میں |
| اُس قادر مطلق کے در پر جھکتے ہیں لا چاری میں |
| کب اس قابل سمجھیں خود کو چلنے کو تیار ہیں اب |
| جیون سارا گزرے چاہے مرنے کی تیّاری میں |
| شاید کچھ مہلت دیتا ہو ، توبہ کی توفیق ملے |
| کب کے ہم تو رخصت ہو تے ورنہ اپنی باری میں |
| اپنی اپنی آن پڑی تو کون بچانے آئے گا |
| کون کسی کے کام آتا ہے خود ہو جب دشواری میں |
| اس نے تو ہر دور میں بھیجا خوشیوں کا پیغام ہمیں |
| کون مگر اہمیّت دیتا دین کو دنیا داری میں |
| اس نے اپنے گھر آنے کا نقشہ بھی تو بھیج دیا |
| ہم نے ہی سنبھال کے رکھا طارق یہ الماری میں |
معلومات