| نرم گر یہ زباں ہوا کرتی |
| زندگی مہرباں ہوا کرتی |
| آزمائش کبھی جو ہوتی بھی |
| پیار کا امتحاں ہوا کرتی |
| اُس کے پیاروں کا نام بھی آتا |
| یوں رقم داستاں ہوا کرتی |
| وہ جو اپنا یقیں نہ دلواتا |
| اُس کی ہستی گُماں ہوا کرتی |
| وہ تو آنکھیں کلام کرتی ہیں |
| بات ورنہ کہاں ہوا کرتی |
| مل کے آئی صبا گلابوں سے |
| ورنہ خوشبو نہاں ہوا کرتی |
| دید ہوتی تو ان کے چہروں پر |
| پھر مُسرّت عیاں ہوا کرتی |
| دیکھ لیتے اگر تِرا جلوہ |
| پھر تو چپ یہ زباں ہوا کرتی |
| تیری تعریف میں ، سمجھتی گر |
| قوم ، رطب اللّساں ہوا کرتی |
| تم سے کہتے اگر ، دعا کرتے |
| با اثر پھر اذاں ہوا کرتی |
| آ کے مل بیٹھتے جو سب طارق |
| کتنی رونق یہاں ہوا کرتی |
معلومات