| سفر کا شوق بھی دُشوار رہگزار بھی ہے |
| جو چل پڑا ہوں تو منزل کا انتظار بھی ہے |
| چمن میں پھول کھلے ہیں فضا میں خوشبو ہے |
| ہو الوداع اےخزاں ، کہہ رہی بہار بھی ہے |
| ہم اس سے پہلے بھی آئے ہیں اس طرف اکثر |
| مگر وہ آیا ہے جب سے یہاں قرار بھی ہے |
| ہمارا حوصلہ بڑھتا ہے اس کی رحمت سے |
| نظر میں اپنے گناہوں کا کچھ شُمار بھی ہے |
| نگاہ نیچی کئے سر جھکائے بیٹھے ہیں |
| ادب کا بھی ہے تقاضا کچھ اس سے پیار بھی ہے |
| مجھے خلوص سے انکار تو نہیں لیکن |
| عروج پر یہاں جذبوں کا کچھ نکھاربھی ہے |
| مرے لہو میں ہے باقی ابھی وفا کی مہک |
| ہزار بار دل و جان یہ نثار بھی ہے |
| نگار خانۂ دل میں بسا ہے عکس اُس کا |
| اسی کی نظرِ عنایت سے دل فِگار بھی ہے |
| نگاہِ شوق میں دیکھا ہے پیار بھی اس نے |
| ہماری بات پہ کچھ اس کو اعتبار بھی ہے |
| گمان ہے یہی طارق تمہیں محبّت ہے |
| جو اُس کا تذکرہ ہے ذکر بار بار بھی ہے |
معلومات