| کہتے ہیں کوئی آتا نظر راہبر نہیں |
| اُترا جو آسمان سے اس کی خبر نہیں |
| جس کو نگاہیں ڈھونڈتی پھرتی تھیں ہر طرف |
| حیرت ہے اس کی سَمت کسی کی نظر نہیں |
| جلتے ہیں یونہی اب بھی کھڑے سخت دھوپ میں |
| سایہ جو دے نظر انہیں آتا شجر نہیں |
| منبر پہ چڑھ کے بولتے با ریش ہیں کئی |
| سوچیں تو ان کے وعظ میں کیونکر اثر نہیں |
| آئے بھی کیسے راستہ سچائی کا نظر |
| خود اپنے آپ سے ہوئے مخلص اگر نہیں |
| پہچانتی ہے فطرتِ انسان فرق کو |
| با طل سے حق کو مات دے ایسا ہُنر نہیں |
| پھل کھائیں نیچے جو ہیں شجر سایہ دار کے |
| جو دور ہیں نصیب میں ان کے ثمر نہیں |
| طارق خدا کے فضل سے ہی رہنمائی ہو |
| آسان ورنہ ڈھونڈنا سیدھی ڈگر نہیں |
معلومات