| اب نظر آتے نہیں صاحبِ کشّاف یہاں |
| مہربانوں کے تھے ہم پر کبھی الطاف یہاں |
| کس کے گھر جاتے جہاں جا کے دہائی دیتے |
| منصفوں کو بھی میسّر نہیں انصاف یہاں |
| وہ جو بولیں بھی تو سچ بات نہیں کہہ سکتے |
| اپنی عزّت کو بچاتے ہوئے اشراف یہاں |
| دوستی مہر و وفا صدق و صفا کوئی بھی |
| اب نظر آتے نہیں ڈھونڈے سے اوصاف یہاں |
| ان سے اب کوئی بھی نسبت نہیں باقی رکھی |
| اعلیٰ کردار کے مالک تو تھے اسلاف یہاں |
| کس کو ہم چہرہ دکھائیں کسے تیار کریں |
| کوئی ملتا ہی نہیں آئینہ شفاف یہاں |
| میری آزادی کا اندازہ تمہیں ہو کیونکر |
| تاک میں بیٹھے ہیں دشمن مرے اطراف یہاں |
| میں غزل کیسے سناؤں وہ سخنور ہی نہیں |
| میرے اشعار فقط وقت کا اسراف یہاں |
| طارق آزادیٔ اظہار کا مطلب کیا ہے |
| تم نے جو کہنا تھا جب کہہ نہ سکے صاف یہاں |
معلومات