| نہیں کہتا کہ مے باقی نہیں ہے |
| تعجّب ہے مگر ، ساقی نہیں ہے |
| نہ گھر ہوں میزباں ، آئیں جو مہماں |
| عمل یہ غیر اخلاقی نہیں ہے ؟ |
| جو آئے بعد میں ، محروم کیوں ہوں |
| خدا کی ایسی رزّاقی نہیں ہے |
| کِیا سیراب اک زم زم سے صحرا |
| تو کیا یہ کارِ تریاقی نہیں ہے ؟ |
| ہدایت آسماں سے اب جو اتری |
| وہ کیا تعلیم آفاقی نہیں ہے |
| ذرا سا غور کر کے کوئی دیکھے |
| یہ نسخہ *سادہ اوراقی نہیں ہے |
| دُعا پہنچے گی کیسے آسماں تک |
| سواری جبکہ برّاقی نہیں ہے |
| لُٹیں ساحل پہ آ کر بھی مسافر |
| سمندر میں ہی قزّاقی نہیں ہے |
| محبّت میں فدا کرتے ہیں جاں بھی |
| جنوں ہی رسمِ عُشّاقی نہیں ہے |
| سُنیں گے کیا فسانہ ہائے ماضی |
| یہاں اب **سوزِ مشتاقی نہیں ہے |
| نہیں سمجھا جو طارقؔ ، کہہ رہا ہے |
| بیاں کرنے کی مشّاقی نہیں ہے |
معلومات