ساری مشکل امتِ مرحوم کی آساں کرے |
آسماں پر مثلِ انجم قوم کو تاباں کرے |
ہے کوئی مردِ مجاہد سینۂ عالم میں جو |
پوری دنیا ملتِ مظلوم پر قرباں کرے |
بنجر و ویران صحرا میں کھلاۓ پھول جو |
قحط سالی کے زماں میں رحمتِ باراں کرے |
جو سکھاۓ ملک و ملت سے وفاداری کا درس |
بندۂ عاصی کو جو پھر صاحبِ ایماں کرے |
قومِ مسلم کے لئے ہی جو کہ تڑپے رات و دن |
آسمانِ نیلگوں کو جو جواں لرزاں کرے |
ہیں مسلماں دینِ حق کا آخری نشو نمود |
قعرِ ذلت سے اٹھا کر ان کو جو شایاں کرے |
کون ہے رسمِ خلیلی میں فنا ہو جائے جو |
قلبِ محرومِ مسرت کو سدا شاداں کرے |
عندلیبِ گلشنِ ناراستہ کو دے جگر |
جو دلِ مایوس میں پیدا ہزار ارماں کرے |
کیا کوئی زنگؒی نہیں ہے عالمِ اسلام میں |
اِس صلاحؒ الدین کو جو مونسِ اِنساں کرے |
جو دکھا دے شاہراہِ منزلِ مقصود بھی |
موجِ مضطر سے بھرادے، پیکرِ طوفاں کرے |
نیک سیرت ، نیک نیت، مردِ مومن کی طرح |
آشناۓ دردِ ملت، خوگرِ میداں کرے |
وسعتِ افلاک کے پہنے قبا کو چاک کر |
جو تخیل کی قبا کو وسعتِ داماں کرے |
مردِ آہن پوش کو پھر ، پیکرِ عزم و وفا |
بزمِ ہندی میں جو ٹیپؒو کی طرح سلطاں کرے |
رمز و رازِ کائناتِ بزم صورت آشنا |
عالمِ اقوام میں مجھ کو سیاست داں کرے |
نعمتِ تقوی سے جو محروم ہوں میں آج تک |
اہلِ دل کے روبرو جو مجھ کو جانِ جاں کرے |
آفریں ہے اس جوانِ جاں فشاں کے واسطے |
جو کہ ملت کو ہمیشہ دہر میں ذیشاں کرے |
اک تمنا میرے دل میں رہ گئی ہے آخری |
پورے عالم کی سیاست میں مجھے شاہاں کرے |
اے خدایا ! ایک ہی خواہش دلِ شاہؔی میں ہے |
قوم کا رہبر بنا کر فخرِ ہندوستاں کرے |
معلومات