یادوں میں اس کا گھر جو ہمیشہ بسا رہے |
پھر کیسے دور ہم سے ہمارا خدا رہے |
جب دل میں اس کے پیار کا روشن دیا رہے |
آنکھوں میں نور اس کا ہمیشہ سجا رہے |
ہم نے سفر میں کب کوئی خود سے قدم لیا |
ہم تو اسی کا ڈھونڈتے ہیں نقشِ پا رہے |
پھولوں کے ساتھ دوستی کچھ اس لئے بھی کی |
گلشن کے ساتھ رشتۂ بوئے وفا رہے |
لازم ہے پیاس دل کی بجھانا بھی دید سے |
سینچا نہیں جو کھیت وہ کب تک ہرا رہے |
اس دل میں ایک اس کا بسیرا ہےمستقل |
ممکن نہیں کوئی یہاں اُس کے سوا رہے |
چاہے گا کون نیند نہ آئے وہ جب مرے |
اس طرح آئے خواب میں چہرہ کھلا رہے |
کچھ دیر یوں بھی اس نے ملانے دیا نہ ہاتھ |
کچھ دیر اور ہاتھ پہ رنگِ حنا رہے |
طارق کبھی نہ ہو سکی جی بھر کے گفتگو |
حائل ہمیشہ بیچ میں شرم و حیا رہے |
معلومات