| شکر اس محسن خدا کا روز و شب شام و سحر |
| جس کے احسانوں کے نیچے ہم ہیں سارے سر بسر |
| اس نے پیدائش سے پہلے بخش دی ہر چیز وہ |
| جس کی پڑ سکتی ضرورت تھی بہ حیثیت بشر |
| پرورش کرنے کو جو موجود تھے ماں باپ یاں |
| ان کے دل میں ڈال دی الفت رہے ہم جن کے گھر |
| دے کے سب سامان صیقل کر دیا ہے عقل کو |
| فائدہ تاکہ اٹھائیں دیکھ کر ہم خیر و شر |
| وہ قویٰ سارے دئے جن کی ضرورت تھی ہمیں |
| سوچنے سننے سمجھنے کی صلاحیت دگر |
| اس نے جسمانی ضرورت کا جو رکھا سب خیال |
| روح کی نشو و نما کیسے ہو اس کی دی خبر |
| انبیا بھیجے ہیں پے در پے ہدایت کے لئے |
| معرفت کے باغ سے تا وہ عطا کر دیں ثمر |
| پھر خلافت بھیج کر دی خوف سے ایسی اماں |
| خیر کی ہم کو عطا اور رحمتوں سے کی نظر |
| اس نے سب تخلیق کی ہے اپنے بندے کے لئے |
| کر دئے سارے مسخر بحر و بر اور ہر شجر |
| دی ہمیں توفیق تا سارے مراتب ہوں عطا |
| نعمتوں سے دین و دنیا کی ہوں مالا مال گھر |
| ہم پہ نازل ہوں فرشتے ہو امامت کا اثر |
| ہم جو پا جائیں محبت اس کی جو خیر البشر |
معلومات