| سسکتا دل مرے سینے میں، کب سے جان مضطر ہے |
| امید و حسرت و افسوس و ارماں کا یہ پیکر ہے |
| ہوا بھی ننگ و عریاں ہے تصور کے گلستاں میں |
| ہیں سایے ، دھوپ ،بارش اور عجب پر کیف منظر ہے |
| شکوہِ کفر دیکھے تو بہاتا ہے یہ خونیں اشک |
| دلِ سیماب لیکن آج حیراں اور ششدر ہے |
| یہ پوچھا ہے مرے دل نے مری نوخیز ہستی سے |
| مسلمانوں کی حالت عصرِ حاضر میں کیوں بدتر ہے |
| بتاؤ کیا کہوں اس کو میں اس کو کیسے سمجھاؤں |
| کہ آلام و مصیبت ہی مسلماں کا مقدر ہے |
| یا یہ کہدوں کہ بہتر ہے یہاں مظلوم سے ظالم |
| یہاں پر کس قدر صاحبْ نظر انساں ستمگر ہے |
| اگر قوت نہیں ہے مومنِ میداں کے بازو میں |
| تو گردِ راہِ گلشن بھی کسی طوفاں سے بڑھ کر ہے |
| جہاں داری, جہاں گیری ,جہاں بانی, جہاں بینی |
| ہے مقصد بزمِ آرا کا کہ مومن کی ہو سلطانی |
| جہانِ آب و گل میں ہے حیاتِ جاوداں جس سے |
| وہ ذوقِ حسنِ زیبائی ادا و حسنِ رحمانی |
| زمینِ عالمِ انساں میں مومن کا یہی رتبہ |
| " خلیفہ انی جاعل" ہے پیامِ حق و قرآنی |
| ہے تعلیمِ خلافت روزِ اول سے مسلماں کو |
| ثباتِ دیں اسی سے ہے ، نفاذِ دینِ ربانی |
| سکھایے تجھ کو قرآں نے ہے آئینِ جہاں بانی |
| تیری فطرت میں رکھی ہے صفات و خوۓ سلطانی |
| عمل پیرا جو ہو جاۓ مسلماں دینِ احمدﷺ پر |
| تو چھا جائے گی پھر دنیا پہ تہذیبِ مسلمانی |
| شتر بانوں کی گودی میں ہے پالا تجھ کو قدرت نے |
| فتوحِ شام نے بخشی ہیں اندازِ شتربانی |
| صلاح الدینؒ ایوبی نے جرأت کا دیا پیغام |
| ہے مومن کی ظفر یابی سراسر عزمِ چٹانی |
| سحر نا آشنا شامیں زمانے کا مقدر ہے |
| نہ ہو پیدا حجابِ شب سے گر صبحِ قلندر ہے |
| گیا وہ دور جب تارے چلے آتے تھے آنگن میں |
| مگر یہ کیا پتہ تھا کہ وہ دورِ رفت پلبھر ہے |
| قمر خورشید کیا ہیں اس دیارِ فقر کے آگے |
| جہاں پر آکے جھک جاتا زمانے کا سکندر ہے |
| تنک تابی سے کرتا ہے جو روشن ظلمتِ شب کو |
| مری تقدیر کا روشن وہ اختر حسنِ دلبر ہے |
| مری ہستی کی اہمیت دیارِ غیر میں کیا ہو |
| اگر میرے تخیل میں نہ فکرِ بیش گوہر ہے |
| نہ مال و زر کی خواہش ہے نہ جاہ و مرتبہ کی چاہ |
| مگر جو شوق رکھتا ہوں میں وہ شوقِ سکندر ہے |
| جہانِ آب و گل میں کچھ نہیں راحت میسر کہ |
| سکونِ قلب ہے جس میں وہ شوق و ذوقِ لیڈر ہے |
| مرے بازو میں رکھی ہے خدا نے قوتِ طغرل |
| لہو میں گرمئی سلجوق رگوں میں خونِ سنجر ہے |
| بتاؤں تیری ہستی کائناتِ بزم میں کیا ہے |
| کہ عزم و حزم میں کیا ہے، حیاتِ رزم میں کیا ہے |
| گلستانِ جہاں میں سرخ لالہ شوخ منظر ہو |
| فضاۓ بزم میں بادِ سحر ہو بادِ انبر ہو |
| گلوں کی شوخیِ رنگیں شبابِ گلستاں ہو تم |
| چمن آراستہ جس سے درخشندہ وہ زیور ہو |
| حضورِ مسندِ عرفاں ، علمبردارِ قرآں تم |
| وفاۓ دینِ خاتم کا جہاں میں درسِ ازبر ہو |
| رسالت پاکِ اطہر کے مکاتب کے فلک بوسو! |
| سلاطینی کے دریا کا دمکتا لعل و گوہر ہو |
| عمؓر، صدیؓق و عثماؓں کی روش تیرے تخیل میں |
| حبیبِ احمؐد مرسل ﷺ ہو شانِ بدر و خیبر ہو |
| مٹایا جس نے فارس کو تہ و بالا کیا روما |
| سوارِ قادسیہ خالدِؓ جانباز حیدؓر ہو |
| تمہیں ہو فاتحِ اندلس، تمہیں موسٰاۓ افریقہ |
| جلادی کشتیاں جس نے وہ طارق ابنِ بربر ہو |
| محمد ابن قاسم ہو، قتیبہ ابن مسلم ہو |
| دیارِ ہـؔند میں محمود و شمس الدین و بابر ہو |
| تمہیں ہند و عرب کے پاسباں ہو ،رہنما ہو تم |
| تمہیں ہو ایشیا کے فخر ، اورنگزیبِ اصغر ہو |
| وہ جس کے نام سے برطانوی اب بھی دہل جائے |
| شکوہ و شانِ حیدر ہو جلالِ ٹیپو مظہر ہو |
| شبِ تاریک چھائی ہے فضاۓ عالمِ کن پر |
| ہو روشن جس سے یہ دنیا ،وہ روشن صبحِ اختر ہو |
| ہو ہنگامہ صفت طوفاں، تلاطم خیز ساغر ہو |
| کشاکش تند طوفاں کے بھنور میں موجِ مضطر ہو |
| ہو تعمیرِ خلافت کے مشدّد خشتِ اوّل تم |
| سیاست کی عمارت کا چمکتا سنگِ مرمر ہو |
| مگر تم سے شکایت ہے جو خود کو بھول بیٹھے ہو |
| زمانے کی فضا رنگین میں مشغول بیٹھے ہو |
| نسل ہو حکمرانوں کی عمل کشکول برداری |
| کہ شانِ بدر خندق پر مثالِ دھول بیٹھے ہو |
| جو غیرت مند ہوتے ہیں حیا سے ڈوب مرتے ہیں |
| مگر یہ تم سراپا ہو ہوۓ مقتول بیٹھے ہو |
| چمن کی آبیاری تھی مقدر اُن جوانوں کے |
| بنے گلشن میں تم لیکن ہو نازک پھول بیٹھے ہو |
| مثالِ قومِ مردہ تم اگر دنیا میں جی کر ہو |
| صفوں میں حکمرانوں کی بے دست و پا گداگر ہو |
| پرے ہیں آنکھ خوابوں سے عزائم نا شناسا ہو |
| جو گردِ راہِ منزل سے الگ ہیں تم وہ رہبر ہو |
| بھلے ہی دہر میں تم بھی بظاھر بزمِ مسلم ہو |
| مگر کہتا ہے دل میرا کہ تم آبا سے دیگر ہو |
| حیاتِ جاوداں کو چھوڑ کر دو پل کی لذت میں |
| بھلا بیٹھے ہو ماضی کو نئی تہذیبی خوگر ہو |
| نشیمن ہیں ترے رحم و کرم پہ غیر قوموں کے |
| جو اپنے آپ کا قاتل ہے خوں آلود خنجر ہو |
| دلِ امید لیکن جب بہت مایوس ہوتا ہے |
| سراپا بن کے دریا چشمِ گوہر بار روتا ہے |
| ہاں، روئیں کیوں نہیں آنکھیں مسلمانوں کی غفلت پر |
| کہ تلواریں ہیں گردن پر مگر غافل کہ سوتا ہے |
| بتاؤ کیا تمہیں اپنے گلستاں کی جواں سالی |
| یہاں کا باغباں ہر دن کلی کا خون پیتا ہے |
| کہیں گردن پڑی ہے اور کہیں اجزائے انسانی |
| گلی کوچوں میں دریا میں دمادم خون بہتا ہے |
| قرینہ شورشِ محشر ، سلیقہ جینے مرنے کا |
| نہ ہو جس میں جواں مردی جہاں میں کب وہ رہتا ہے |
| نہ خوں میں مستئ طوفاں نہ موجوں کی سی جولانی |
| تلاطم آشنا دریا بھلا ایسے ہی بہتا ہے |
| مگر امیدِ غالب ہے کہ اک دن مان جاؤ گے |
| ہاں، نقشِ پائے آبا کو کبھی پہچان جاؤ گے |
| ستارہ توڑ کر لانا ترا مقصد ازل سے ہے |
| ثریا کی بلندی کو کسی دن جان جاؤگے |
| نگاہوں کو ذرا کھولو کہ کیا کچھ ہو رہا ہے اب |
| نہ سمجھیں بات میری گر تو تم زندان جاؤ گے |
| اگر ہمت نہ کر پائے زمانے کے مقابل کی |
| نکالے ہند سے جاؤ گے پھر توران جاؤ گے |
| تمہیں مظلوم ہوگے اور کہا جائے گا ظالم بھی |
| بنائے ظلم کا لیکن تمہیں عنوان جاؤ گے |
| سراپا درد و حسرت کی کہانی پھر تری ہوگی |
| گھروں سے بے دخل ہو کر جو تم شمشان جاؤ گے |
| صفیں سیدھی کرو مؤمن کہ اب وقتِ قیام آیا |
| زمانے کو جگانے کے لئے ہی یہ پیام آیا |
| بنو مظلوم کی امید ظالم کے لئے ظالم |
| ہے اس سے دین و دنیا بھی جواں تیری صحیح سالم |
| اٹھو اب بھی تو بن سکتی ہیں پھر بگڑی ہوئی باتیں |
| گیا جو وقت غفلت میں نہ ہو تم اس پہ اب نادم |
| خودی کو قوتِ ایماں سے آہن پوش کر ڈالو |
| تقاضہ دورِ حاضر کا یہی ہے ، جنگ ہے لازم |
| تری راہِ محبت میں جو ہے سنگِ گراں حائل |
| بکھر کر چور ہوجائے کمر بستہ ہو گر عازم |
| کرو بیدار خود کو قوم و ملت کو یہ سمجھاؤ |
| زمانے کو ہلا سکتے ہو تم اے نوجواں مسلم ! |
| مگر کیا ہوگیا ہے میری ملت کے جوانوں کو |
| کہاں ہیں وہ جو لرزاتے تھے کل تک آسمانوں کو |
| عزائم کی بلندی سے جہاں کو رام کرتے تھے |
| جو خاکِ پا میں رکھتے تھے جہاں کے حکمرانوں کو |
| وہ شاہینی جگر مسلم جواں اب کھو گئے سارے |
| نکل جاتے جو صحرا میں جلا کر آشیانوں کو |
| وہ جس نے دہر کو اپنی ثنا خوانی پہ اکسایا |
| ہمیشہ فخر ہے اس پر امم کی داستانوں کو |
| جو خوشبو پھوٹ کر آئی تھی صحرائے عرب سے وہ |
| گلِ گلزار کرتی تھی جہاں کے گلستانوں کو |
| کبھی سوچا ہے وہ کیا تھی جو شہ زوری سکھاتی تھی |
| پہاڑوں کے مقابل لا کے رکھتی ناتوانوں کو |
| وہ فکرِ قوم و ملت تھی اسی سے ہو جہاں میں تم |
| نہ ہو ملت کی ہمدردی تو ہو تم اس جہاں میں گم |
| اگر رہنا ہے دنیا میں فلک بوسوں کی بستی ڈھونڈ |
| نکل کر میکدے سے انجمن میں جام و مستی ڈھونڈ |
| ستارے ہو تو تُو بھی جگمگا آفاقِ عالم پر |
| وگرنہ شام ڈھلتے ہی زمیں والوں کی پستی ڈھونڈ |
| زمانہ غرق ہے دریائے تہذیب و تمدن میں |
| جو دریا پار کرنا ہے تو راہِ حق کی کشتی ڈھونڈ |
| تری تصویرِ ہستی بزمِ عالم میں کہیں گم ہے |
| نکل کر اب صنم خانے سے اے دل اپنی ہستی ڈھونڈ |
| زمانے سے مگر کیوں تو اے دل! بیزار رہتا ہے |
| بھلا کیا باغ مالی کے بنا گلزار رہتا ہے |
| صنم کی اک نگاہِ ناز سے ملتا سکوں تجھ کو |
| ہراک لمحہ تو شوقِ دید میں بیدار رہتا ہے |
| کسی لیلی کی الفت میں بناکر بھیس مجنوں کا |
| زمانے کی نگاہوں میں ذلیل و خوار رہتا ہے |
| ترے فولادی بازو میں کبھی تلوار ہوتی تھی |
| مگر افسوس ہے کہ اب کوئی مزمار رہتا ہے |
| کبھی قدموں تلے اوجِ ثریا کو کچلتے تھے |
| مگر اب دیکھ حالت بے بس و لاچار رہتا ہے |
| جلا کر آگ سینے میں تپش سے لطف لیتا ہے |
| صنم خانے سے دھتکارا، سدا مے خوار رہتا ہے |
| کشش تصویر میں ہوتی نہیں ہرگز کبھی پیارے |
| ہاں، پنہا صاحبِ تصویر کا کردار رہتا ہے |
| ہزاروں شمع جلتی ہیں محبت خانۂ دل میں |
| نیا ہے عشق تیرا طالبِ گفتار رہتا ہے |
| حصولِ حسن آرا ہی رہا مقصد ترا اے دل! |
| جنونِ عشق سے ہر آن تو سرشار رہتا ہے |
| چلو اب لوٹ چلتے ہیں اسی راہِ وفـا پر پھر |
| جہاں کا ذرہ بھی مانندۂ کہسار رہتا ہے |
| حسینوں کی اسیری سے صفت آزاد ہو جاؤ |
| جہانِ عشق میں پھر خانماں آباد ہو جاؤ |
| مجھے دیکھو میں تصویرِ جنونِ آشکارا ہوں |
| جہاں تابی کی ہے خواہش گو ننھا سا ستارا ہوں |
| جلاکر رنگ و بو کو راکھ کردوں اپنی آتش سے |
| جوالا دل ہے میرا گرچہ میں ادنی شرارا ہوں |
| تڑپتی شام جس کی دید کو دولخت ہو بیٹھی |
| شبِ ظلمت کا قاتل ہے جو وہ صبحِ نظارا ہوں |
| جہاں بانی مرا مقصد مری طینت میں سلطانی |
| اٹھاۓ گا زمانہ جس کو سر پر تاجِ دارا ہوں |
| مری فطرت سلیؑمانی، مرے رگ رگ میں شبؓیری |
| میں "سیف من سیوف اللہ" میں تیغِ آبدارا ہوں |
| بیاں میں کیا کروں اپنی طرف سے اے جہاں والو |
| بشارت خود ہی سن لو مصطفیٰ کی اے گماں والو |
| ہر اک جانب پیامِ صاحبِ یاسین جائے گا |
| جہاں کے کاخ و کو میں راکبِِ طاسین جائے گا |
| نویدِ مصطفائی ہے خلافت ہوگی پھر قائم |
| جہاں تک صبح جاتی ہے وہاں تک دین جائے گا |
| جہانِ رنگ و بو میں ہر طرف اسلام پھیلے گا |
| عرب کے ریگزاروں سے نکل کر چین جاۓ گا |
| صدائے" لاالہ" سے ساری دنیا گونج اٹھے گی |
| مٹے گا فتنۂ عزی، حبل غمگین جاۓ گا |
| شریفوں کو شرافت سے ذلیلوں کو فضیحت سے |
| کیا جائے گا ایماں پیش اور فتین جائے گا |
| ہاں منہاجِ نبوت پر خلافت پھر سے قائم ہے |
| یہ دینِ فاتحِ عـالــم ہی اس دنیا میں دائم ہے |
| جہاں میں پھر سے چمکے گا محمدﷺ مصطفی کا دیں |
| مٹے گا کفر دنیا سے رہے گا بس خدا کا دیں |
معلومات