| پانی کی لہروں میں چہروں کے تھِرکتے خدّوخال |
| جس طرح مفلس کی بانہوں میں تڑپتے نَو نہال |
| اس طرف پیرانہ سالی کی نقاہت کا بخار |
| اس طرف بچّوں کے شِکمِ جبر کی زندہ مثال |
| کٹ گئی ہے عمر ساری این و آں کی دوڑ میں |
| نہ کوئی شغل و لطافت نہ کوئی زہرہ جمال |
| کیا ہو عمرِ خضر بھی ان کو اگر مل جائے تو |
| رات دن کا رونا دھونا عسرت و غم سے نڈھال |
| کل مہاجن تھا مرا جو اب بھی ان داتا وہی |
| مفلس و نادار کی بیٹی کی عصمت پائمال |
| الہدیٰ بھیجی گئی ہے نسلِ آدم کے لئے |
| میرے منہ میں خاک لیکن دیکھتے ہیں خال خال |
| لم یزل ہے ذاتِ اقدس پر ز راہِ نکتہ سنج |
| غربت و افلاس بھی لگتے ہیں مجھ کو لازوال |
| اک ہی رونا ہے مرا صبح و مسا شام و سَحَر |
| پیٹ بھر روٹی دوا دارُو سکولوں کا وبال |
| ختم ہوں گے کب یہ جھنجھٹ کب ڈھلے گی شامِ غم |
| کب چلے گی بادِ پُرنم کب بہارِ برشگال |
| ہاتھ پھیلائے کھڑھے ہیں کب سے راہوں میں امید |
| کر دے پُوری خواہشیں اے کامل و اکمل کمال |
معلومات