ہم پہ پھر نظرِ عنایت ہو ضروری تو نہیں |
ان سے ملنے کی اجازت ہو ضروری تو نہیں |
آ گیا جب سے مسیحا ، ہوئے مُردے زندہ |
روز اک تازہ قیامت ہو ضروری تو نہیں |
رات اٹکھیلیاں کرتی رہی مشعل سے ہوا |
دشمنوں ہی کی شرارت ہو ضروری تو نہیں |
دست با کار رہے دل میں اگر یار رہے |
رات دن محوِ عبادت ہو ضروری تو نہیں |
نہ سہی آپ نہیں رکھتے مراسم ہم سے |
آپ کو ہم سے عداوت ہو ضروری تو نہیں |
جب کبھی آپ عیادت کو ہماری پہنچیں |
ہم میں اٹھنے کی بھی طاقت ہو ضروری تو نہیں |
ایک سجدے کے نہ ہونے سے پڑی مشکل جو |
اب کوئی اور بغاوت ہو ضروری تو نہیں |
اس کے دربار میں عزّت ہمیں طارق ہو نصیب |
شاعری باعثِ شہرت ہو ضروری تو نہیں |
معلومات