| مرا بھی خون بہا تھا چمن بنانے میں |
| انہیں یہ ذکر گوارا نہیں فسانے میں |
| جنوں میں آکے خرد نے بھی ساتھ چھوڑ دیا |
| خرد پہ دور یہ آیا ہے اس زمانے میں |
| گماں ہے اس کو کوئی عیب اب نہیں باقی |
| اگرچہ وقت لگا آئینہ چھپانے میں |
| اسی لئے تو نہیں کوئی توڑ پایا مجھے |
| بنا ہوں میں بھی تو قدرت کے کارخانے میں |
| حسین دیکھے جو دنیا کے روز و شب تو کہا |
| کسی کو وقت لگا ہو گا سب سجانے میں |
| وہ لوٹ آیا ہے ساقی ، خیال یہ کر کے |
| کوئی بھی جام نہ باقی رہا مے خانے میں |
| کسی درخت پہ بیٹھا رہا تھا شب بھر جو |
| پہنچ سکا وہ پرندہ نہ آشیانے میں |
| میں امتحان سے گزرا ہوں بارہا طارق |
| اسے بھی تجربہ ہے مجھ کو آزمانے میں |
معلومات