گناہ جب بھی کبھی تجھ کو آزمائے گا |
ضمیر تیرا تجھے روشنی دکھائے گا |
کبھی کسی کی مدد بے غرض جو کی ہوگی |
کوئی فرشتہ ضرورت کے وقت آئے گا |
پکار پر تری آئیں گے لوگ سننے کو |
اگر خدا کے لئے تُو صدا لگائے گا |
یہ مت سمجھ کہ سدا ہر جگہ ہی سارے لوگ |
تجھے قبول کریں گے جہاں تُو جائے گا |
ہیں جس نے بیج ہی نفرت کے بوئے آج تلک |
تو پھر شجر وہ محبّت کے کب اگائے گا |
زمین ہو گی جو زرخیز نم اگر حارث |
تو سبز کھیت وہاں جلد لہلہائے گا |
اگر رہا تِرا رحمٰن سے تعلّق تو |
جو پاس آئے گا شیطان منہ کی کھائے گا |
رواں ہے نہر تری رو ح پاک کرنے کو |
تُو پانچوں وقت اگر روز ہی نہائے گا |
خدا کی راہ میں تُو اپنا مال دینے سے |
ہمیشہ مال کو اپنے فقط بڑھائے گا |
رہا جو غیب پر ایماں ترا یقین کے ساتھ |
کہ آخرت ہے یقیناً فلاح پائے گا |
یہ درس دیتا ہے قرآن متقی کے لئے |
وہ سرخرو ہے جو طارق نجات پائے گا |
معلومات