| وہ مجھ کو ڈھونڈتا پھرتا ہے تب سے |
| میں اپنے آپ میں کھویا ہوں جب سے |
| مرا واقف یہاں کوئی نہیں ہے |
| بہت تنہا ہوا ترکِ نسب سے |
| مرے دشمن تو میرے سامنے تھے |
| کسی اپنے کا تیر آیا عقب سے |
| مسیحا دیر کر دی آتے آتے |
| وہ سویا ہے تڑپتا تھا جو شب سے |
| جہاں پر سر قلم میرا ہوا تھا |
| وہاں اب پھول رکھتے ہیں ادب سے |
| مجھے جلدی سے جھنڈے میں لپیٹو |
| جنازہ کچھ تو نکلے میرا ڈھب سے |
| ہے اب شہرِ خموشاں میرا مسکن |
| یہاں سے جو بھی گزرے کچھ ادب سے |
معلومات