| پاتا ہے آدمی تو خزانے کوئی کوئی |
| اور دیکھتا ہے خواب سہانے کوئی کوئی |
| فطرت کھلی کتاب ہے جو چاہے دیکھ لے |
| رازِ درونِ خانہ تو جانے کوئی کوئی |
| غاروں میں رہ کے لوگ گزارہ کریں مگر |
| آتا ہے شہر کو تو بسانے کوئی کوئی |
| صحرا میں کیسے آئے گا طوفان سب کہیں |
| آتا ہے اُس میں کشتی بنانے کوئی کوئی |
| سچ دیکھنے کو آگ میں پھینکیں سبھی مگر |
| آتا ہے اپنی پیاس بجھانے کوئی کوئی |
| ہر دور میں طلسم و تماشہ دکھائیں لوگ |
| آتا عصا ہے سانپ بنانے کوئی کوئی |
| فرعونِ وقت حق کے تعاقب میں ہیں سبھی |
| ہوتا ہے غرق کون یہ جانے کوئی کوئی |
| کتنے ہی لوگ چڑھ گئے سچ کی صلیب پر |
| چڑھتا ہے آسمان پہ جانے کوئی کوئی |
| کرتے ہیں معجزات کا سب ہی مطالبہ |
| پر ان کو دیکھ کر بھی تو مانے کوئی کوئی |
| اخلاق معجزے سے زیادہ ہیں پُر اثر |
| ترکش میں ڈال تیر یہ تانے کوئی کوئی |
| طارق پڑھو جو خود کو تو شاید یہ جان لو |
| ہوتے ہیں آدمی بھی خزانے کوئی کوئی |
معلومات