| شرافت ہچکچائے جن سے یہ وہ پیر لگتے ہیں |
| تو ان کے معتقد کیوں صاحبِ توقیر لگتے ہیں |
| سنا تھا ذکر جن لوٹوں کا اب بھی ہیں سیاست میں |
| کبھی چمچے جو کہلاتے تھے اب کفگیر لگتے ہیں |
| مرے کچھ مہرباں نالاں ہیں اتنے ڈاکٹر سے اب |
| حکیموں کے سبھی نسخے انہیں اکسیر لگتے ہیں |
| انہیں گھر بھی چلانا ہے الیکشن جیتنا بھی ہے |
| مسائل اب انہیں لوگوں کے سب گمبھیر لگتے ہیں |
| انہیں پیرِانِ تسمہ پا سے کوئی تو بچا لے اب |
| وہ قینچی ڈال کر گردن پہ رسہ گیر لگتے ہیں |
| ہمیں ان کی سیاست سے نہیں کچھ لینا دینا پر |
| مصیبت میں انہیں پا کر ذرا دلگیر لگتے ہیں |
| یہ دنیا چار دن یوں جو عجب سپنے دکھاتی ہے |
| وہ کب ہوتے ہوئے شرمندۂ تعبیر لگتے ہیں |
| ہمارا کام ہے طارق انہیں اتنا بتا دینا |
| یہ لیڈر ان کی اپنی ہی کوئی تقصیر لگتے ہیں |
معلومات