| نگاہیں کیوں مگر کرتی مری گوہر فشانی ہے |
| دلِ فولاد لیکن آج محوِ خوں چکانی ہے |
| دلِ غیور کہتا ہے غموں کے بھیڑ میں مجھ سے |
| نہ ٹپکے آنکھ سے آنسوں اگر تو خاندانی ہے |
| سبھی کو اس جہانِ بے ثباتِ کن سے جانا ہے |
| یہ آنا جانا تو اے دل ! زمانے کی نشانی ہے |
| یہ آغازِ مصیبت ہے ذرا دشوار تو ہوگا |
| ذرا دل تھام کر بیٹھو کہ باقی زندگانی ہے |
| غمِ ہجرت کی آتش میں ابھی تو دل کو جلنا ہے |
| ابھی سے ہار بیٹھے ہو ابھی تو جان جانی ہے |
| ابھی بچپن سے نکلے ہو, ذرا سا اور جینا ہے |
| جواں! غافل نہ ہو جانا بہت تھوڑی جوانی ہے |
| اٹل ہے فیصلہ اس کا بڑھاپا اک بہانا ہے |
| اجل وقتِ معین ہے بھلے ہی ناگہانی ہے |
| بہت آساں ہو جائے گایہ رفتہ رفتہ تجھ پر بھی |
| اے دل ! غمگیں نہ ہو جانا یہی سب کی کہانی ہے |
| غم و افسوس کیا کرنا ملاتی ہے خدا سے موت |
| میسر جس کو ہو جائے خدا کی مہربانی ہے |
| خدا آباد رکھنا اپنے ہم نامِ صمؔد کو بس |
| مرے بیتاب جذبوں کی یہی کچھ ترجمانی ہے |
| نہ ڈرنا موت سے ہرگز کہ یہ بس شامِ دنیا ہے |
| اے شاہؔی موت تو صبحِ حیاتِ جاودانی ہے |
معلومات