| چلی ہے کس ڈَگَر، بگڑی ہوئی ہے |
| زباں پر ہے اثر ، بگڑی ہوئی ہے |
| کریں ہم اعتبار اب کیا کسی پر |
| جو ملتی ہے خبر ، بگڑی ہوئی ہے |
| وہ اُس کے گھر کو جاتی تھی سڑک جو |
| نہیں آساں سفر ، بگڑی ہوئی ہے |
| وہی گردش ہے جاری آسماں کی |
| مگر شام و سحر ، بگڑی ہوئی ہے |
| بھلا شکوہ کریں کیا زندگی سے |
| رہا باقی نہ ڈر ، بگڑی ہوئی ہے |
| نہ پوچھو روح کے پیاسوں کی حالت |
| جو آتی ہے نظر ، بگڑی ہوئی ہے |
| ادب کی جو ہوا کرتی تھی عادت |
| وہ باقی ہے اگر ، بگڑی ہوئی ہے |
| اُٹھے گھبرا کے سپنوں میں جو دیکھے |
| یہ دنیا اس قدر ، بگڑی ہوئی ہے |
| نہ دیکھا تیرگی میں چاند نکلا |
| کہا قسمت مگر بگڑی ہوئی ہے |
| کوئی تو نبض دیکھے عاشقوں کی |
| ملا جو چارہ گر، بگڑی ہوئی ہے |
| سنبھالو تم بھی طارق ، دل کی حالت |
| کسی کو دیکھ کر بگڑی ہوئی ہے |
معلومات