| دُکھوں کے درد دعاؤں میں ڈھل نہ جائیں کہیں |
| ستم گروں پہ یہ تلواریں چل نہ جائیں کہیں |
| تماشہ دیکھتے ہیں روز جینے مرنے کا |
| بُلاوا آ گیا تو سر کے بل نہ جائیں کہیں |
| ہیں تاک میں سبھی صیّاد یوں قفس لے کر |
| پرندے اپنے نشیمن بدل نہ جائیں کہیں |
| کسی کے گھر کو جلانے تو آگئے ہو تم |
| یہ سوچ لینا کہ ہاتھ اپنے جل نہ جائیں کہیں |
| تمہیں یہ ڈر ہے مری گرمئِ محبّت سے |
| وہ سنگ دِل جو ہوئے ہیں پگھل نہ جائیں کہیں |
| کچھ اِس میں ڈال دیئے اور خَم حسینوں نے |
| کہ زُلفِ یار سے عاشق نکل نہ جائیں کہیں |
| مجھے تو بیٹے کو قربان کرنے جانا ہے |
| یہ مار کھا کے شیاطیں سنبھل نہ جائیں کہیں |
| فرشتے راہ میں آنکھیں بچھائیں گے طارق |
| اگر یہ حضرتِ انساں پھسل نہ جائیں کہیں |
معلومات