| شب کی تنہائی میں چپکے سے میں رو لیتا ہوں |
| جب مجھے ٹوٹے ہوئے دل کا خیال آتا ہے |
| خشک ہونٹوں پہ تبسم کی کلی کھلتی ہے |
| چشمِ مضطر میں جو اس جاں کا جمال آتا ہے |
| ، |
| دل یہ ویراں ہے کہ آباد کروں میں کیسے |
| میرے آزردہ خیالوں میں وہ اب تاب نہیں |
| دل یہ اجڑا ہے تو اجڑے ہی اسے رہنے دو |
| اس کی تزئین دوبارہ کرے جو وہ خواب نہیں |
| ، |
| پھر وہی خواب سہانے مجھے آجاتے ہیں |
| جس کی تعبیر فضیحت کے سوا کچھ بھی نہیں |
| کتنا رسوا ہوں زمانے کی نگاہوں میں اب |
| بزمِ ہستی مری عبرت کے سوا کچھ بھی نہیں |
| ، |
| یہ بھی کیا کم ہے ہمیں ان سے محبت تو ہے |
| ورنہ نفرت میں یہاں لوگ جیا کرتے ہیں |
| ہم تو اک آہ ہیں ہر دل سے نکل جاتے ہیں |
| آپ چاہت ہیں کہ ہر دل میں بسا کرتے ہیں |
| ، |
| مرے ناکام ارادے نہیں جینے دیتے |
| جام ہونٹوں سے لگاتے نہیں پینے دیتے |
| زندگی کتنی شکایات کروں میں تم سے |
| موت آتی ہے مگر تم نہیں آنے دیتے |
| ، |
| ہم نے سوچا تھا کہ اس دل سے نکل جاۓگی |
| سنگ دل بن کے کبھی موم پگھل جائے گی |
| خشک پتوں کی طرح سارے بھرم ٹوٹ گئے |
| کہ اچانک مرے بت خانے حرم ٹوٹ گئے |
| ، |
| ہونا ہو رسوا جسے آکے محبت کرلے |
| مرنا بے موت جسے آکے محبت کرلے |
| یہ محبت نہیں کچھ اس کے سوا اے شاہی ؔ |
| ہونا برباد جسے آکے محبت کرلے |
معلومات