| اک خاک کا ہوں ذرہ، خورشید کا جگر ہوں |
| رہتا زمیں پہ لیکن، گردوں کا ہم سفر ہوں |
| تارے ہوں کہکشاں ہوں، جاگیر ہیں یہ اپنی |
| اس گلستانِ نو کا، اکلوتا تاج ور ہوں |
| روشن ہیں میرے اندر لاکھوں ہزاروں انجم |
| شمس و قمر ہیں دھاریں، میں نور کی نہر ہوں |
| عصرِ نوی کی ظلمت، مجھ سے ہی دور ہوں گے |
| تاریک شب میں کامل، مہ، چودھویں قمر ہوں |
| جگنوں کا دل لئے میں روشن جہاں کروں گا |
| کم نور یاب لیکن ،آتش فشاں شرر ہوں |
| تتلی کے پر لگاۓ میں کائنات گھوموں |
| بادِ صبا کا گرچہ نا آشنا سفر ہوں |
| پروازِ نو کے آگے ہے گردشِ فلک کیا |
| میں ہم نوا ملائک، جبریلی بال و پر ہوں |
| تقدیر امتوں کی لکھی گئی ہے جس سے |
| میں اس قلم سے نکلا دریائے آبِ زر ہوں |
| تاجِ سکندری بھی دستک سی دے رہی ہے |
| ادنی وجود میرا ،لیکن میں تاج گر ہوں |
| تنکوں کے خوف سے ڈرتا نہیں ہوں میں |
| کم سن گو میری ہستی لیکن میں بے خطر ہوں |
| یہ بے ضرر ہمالہ ذرہ سمجھ رہا ہے |
| اک پھونک سے اڑا دوں اتنا میں بااثر ہوں |
| میں جستہ جستہ اک دن پہنچوں گا اپنی منزل |
| ہے راہ پر خطر گو، بے خوف ہوں نڈر ہوں |
| تابِ جبیں پہ میری دنیا یہ مر مٹے گی |
| میں سینۂ جہاں میں ،نایاب ہوں گہر ہوں |
| کہنہ خیال ہوں میں دورِ جدید میں بھی |
| بے تیغ ہوں اگرچہ لیکن میں کارگر ہوں |
| ہر بزم میرے دم سے ہر انجمن کی جاں ہوں |
| تزیینِ گلستاں میں کردارِ نامور ہوں |
| ہر پھول ہے معطر ہر گل نشاط آور |
| آراستہ چمن ہے جس سے، میں وہ شجر ہوں |
| آباد ہیں گلستاں سوزِ دروں سے میرے |
| بستی ہیں مجھ میں قومیں اسلاف کا نگر ہوں |
| میرے نفس سے قائم سارا نظامِ عالم |
| جھکتا جہاں ہے گردوں وہ بے نیاز در ہوں |
| ہجر و وصال کا میں لیکن حسین سنگم |
| عشقِ مجاز سے میں واللہ دربدر ہوں |
| عزم و وفا کا پیکر مانندۂ احد ہوں |
| ہاں، غزوۂ جہاں میں میؔں حاملِ بدر ہوں |
| قدرت نے انقلابی تختے پہ جو لکھا ہے |
| تحریر کی جبیں پر پُرنور اک سطر ہوں |
| اسلام کی محبت ہرشی سے مجھ کو پیاری |
| اسلام کا محافظ اسلام دیدہ ور ہوں |
| آباء کی جانثاری کو یاد کر کے ہردم |
| ہیں اشک بار نالے اور میں کہ چشمِ تر ہوں |
| یہ پوچھتا ہے مجھ سے اسلام کا چمن کہ |
| ویرانیوں کا کیوں اب میں آج رہگزر ہوں |
| کیا یہ بتادوں دوں اسکو میں ہوں اسیرِ دوراں |
| ظالم کے آگے ساکت چپ چاپ سر بسر ہوں |
| جاگو ہوا سویرا غفلت کی نیند سے اب |
| شامِ سیاہ کا قاتل امیدۓ سحر ہوں |
| معدوم میری ہستی خالی وجودِ نم سے |
| میں کچھ نہیں ہوں لیکن سب کچھ ہی ہاں مگر ہوں |
| یہ سب مری حقیقت واللہ سچ ہیں سارے |
| پر دیکھتا ہوں خود کو، جانے کہاں ،کدھر ہوں |
| پھر بھی جلایے رکھا امید کی دیا ہے |
| مردہ دلوں میں میں کہ روح و رواں عمؔؓر ہوں |
| عجمی لباسِ نو میں ہوں شہسوارِ یثرب |
| عہدِ جدید میں بھی میں صاحبِ نظر ہوں |
| دو چار تارے دیکر بہلا رہے ہو مجھ کو |
| کیا منشأِ خدا سے لگتا ہے بے خبر ہوں |
| افلاک سے بھی اوپر ہے کاروانِ خاکی |
| عالم کے پیش و پس سے ہر چند با خبر ہوں |
| تسخیرِ بزمِ عالم ، دنیا کی حکمرانی |
| ہے کائنات مقصد گرچہ میں بے ہنر ہوں |
| مابین اس جہاں کے جو بھی ہیں سب ہیں میرے |
| عزمِ جواں، جواں دل، شاہؔی جو میں اگر ہوں |
معلومات