| جل گئی بستی تو سب کہتے ہوئے پائے گئے |
| یہ وہی شعلے ہیں جو پہلے بھی بھڑکائے گئے |
| چھوڑ دو رہنے بھی دو کیوں پوچھتے ہو بار بار |
| ہم وہی مضمون ہیں جو بارہا آئے گئے |
| یہ تعلّق پارسائی کا نہیں قربت کا ہے |
| ہم جہاں پہنچے ہمارے ساتھ ہَمسائے گئے |
| اس طرف مجبور و بے بس اس طرف عِزّ و شرف |
| جو کبھی سوچے نہیں وہ جرم منوائے گئے |
| روشنی بھی خوب ہے لیکن اندھیرے خوب تر |
| اس سے بڑھکر اور کیا ہر چیز کے سائے گئے |
| ہائے اس حسنِ مجسّم کا انوکھا احتجاج |
| وہ تمہارے کچھ نہ تھے تو ساتھ کیوں لائے گئے |
| وہ جنہیں گلشن کے حسن و قبح پر تھا اختیار |
| باغباں آیا تو رنگ و بُو کو ترسائے گئے |
| پیار ہے چاہت ہے خوشیاں ہیں محبّت ہے یہاں |
| جھونپڑی میں دیکھ لو آکر جو گنوائے گئے |
| نفرتوں کے بیج بو کر کیا ملا تجھ کو خطیب |
| ہم کبھی کافر کبھی کافر وہ ٹھہرائے گئے |
| سادگی اچھّی ہے لیکن اے امید ایسا بھی کیا |
| جب بھی دادِ حُسن دی بس تیر برسائے گئے |
معلومات