| بچپن سے ہی رہی ہے تری جستجو مجھے |
| دیدار کی ہمیشہ رہی آرزو مجھے |
| آئے گا تب سکوں جو پلائے نگاہ سے |
| تسکین دے سکے نہیں جام و سبو مجھے |
| سوچا ہے یاد تُجھ کو دلاؤں گا میں کبھی |
| بھولی ہے کب جو تُجھ سے ہوئی گفتگو مجھے |
| تُجھ سا نہیں ہے کوئی بھی سارے جہان میں |
| کافی ہے ایک دیکھنے کو خوبرو مجھے |
| پوری وصالِ یار کی خواہش مری جو ہو |
| باقی نہیں رہے گی کوئی آرزو مجھے |
| میں تیری کائنات ہی کو دیکھتا رہوں |
| آتا ہے جب نظر تو یہاں چار سُو مجھے |
| میں کامیاب ہوں تو فقط تیرا ہے کرم |
| تُو نے ہی امتحاں میں کیا سرخرو مجھے |
| مایوس تو ہوا نہیں رحمت سے میں تری |
| رہتی ہے یاد آیتِ لا تقنطوا مجھے |
| طارق نہ اس کی نعمتوں کا ہو سکے شمار |
| حسرت سے یوں نہ دیکھتا ورنہ عدو مجھے |
معلومات