| نہ دیکھ پائیں گے ہم گر وہ بے نقاب آیا |
| ہمیں تو وصل کی خواہش سے بھی حجاب آیا |
| مدد کو آؤ گے کیا تم جو رُوبرو ہوں گے |
| کسی سوال کا ہم کو نہ گر جواب آیا |
| ہوا میں جب ہوئی تحلیل اِس کی حدّت سے |
| یقین ہو گیا شبنم کو آفتاب آیا |
| نہ روک پایا کوئی وقت چند لمحے بھی |
| نہیں ہے لوٹ کر آخر کبھی شباب آیا |
| جو مُڑ کے ڈالتے ہیں زندگی پہ ایک نظر |
| ہمیں تو یوں لگے سوتے میں کوئی خواب آیا |
| جہاں گیا ہوں قناعت کو ساتھ لے کے گیا |
| میں حسرتوں کو کہیں راستے میں داب آیا |
| یہاں سے جاتے ہوئے فکر ہے تو اتنی ہے |
| کہوں گا جا کے یہ کیسے کہ کامیاب آیا |
| ہماری زیست یہاں اتنی دیر ہے طارق |
| کہ بہتے پانی میں بارش کی اک حُباب آیا |
معلومات