| اے سمندر تری وسعت ، تری گہرائی کو |
| کون جانے ترے اندر چھپی سچائی کو |
| بیٹھ کر میں لبِ ساحل فقط اتنا سوچوں |
| عمر لگ جائے گی تجھ سے تو شناسائی کو |
| اپنے اندر تُو سمو لیتا ہے دریاؤں کو |
| خود کبھی آگے نہیں بڑھتا پذیرائی کو |
| تجھ سے ملنے کو چلے آتے ہیں جو لوگ یہاں |
| دور کرنے کو تری آتے ہیں تنہائی کو |
| تیرے پاتال میں موتی بھی جنم لیتے ہیں |
| لعل و گوہر بھی یہیں ملتے ہیں شیدائی کو |
| سر پٹکتی ہوئی موجیں یہ عیاں کرتی ہیں |
| چاند سے عشق ہوا جاتا ہے سودائی کو |
| کتنی انسان نے جنگیں ترے سینے پہ لڑیں |
| بیڑے تیار ہوئے کتنے ہیں چڑھائی کو |
| بھوکے انسانوں کو تُجھ سے جو غذا ملتی ہے |
| بن کے بارش تِرا پانی ہے مسیحائی کو |
| کوکھ سے تیری جنم لیتے ہیں طوفاں لاکھوں |
| ڈر کے دیکھیں سبھی لی تُو نے جو انگڑائی تو |
| کون رکھتا ہے تجھے اپنی حدوں میں آخر |
| دل پریشاں ، پڑی حیرت میں ہے دانائی تو |
| یونہی طارق نہیں آتی ہے گلوں میں خوشبو |
| چاہئے جہدِ مسلسل چمن آرائی کو |
معلومات